Қазақстанда қытайлық компаниялар көбейді

Қазақстанда Қытай инвесторларының қатысуымен жұмыс істейтін компаниялар саны артып келеді, деп хабарлайды LS.

2025 жылғы 1 шілдедегі мәлімет бойынша, елде ҚХР инвесторлары қатысатын 6 мыңнан астам заңды тұлға тіркелген. Бұл көрсеткіш 2024 жылдың осы кезеңімен салыстырғанда 42,8%-ға көп.

Ал белсенді жұмыс істеп тұрған қытайлық кәсіпорындар саны 1,6 есеге өсіп, 4,5 мыңға жетті.

Орта (26) және шағын (4,4 мың) бизнес субъектілерінің саны тиісінше 18% және 1,6 есеге артқанымен, ірі компаниялар саны азайған – бір жылда 20%-ға кеміп, небары 16-ы қалған.

Қытайлық инвесторлар ең көп жұмыс істейтін салалар – сауда (1,8 мың кәсіпорын, +1,7 есе), құрылыс (384, +1,6 есе) және өңдеуші өнеркәсіп (383, +1,8 есе).

Қоғамдық тамақтану және қонақ үй бизнесіндегі қытайлық компаниялар саны екі есеге көбейіп, 87-ге жетті. Ғылыми-техникалық қызмет саласында да белсенділік артып, мұндағы кәсіпорындар саны 2,3 есеге өсіп, 203-ке жеткен. Ауыл шаруашылығы саласында да Қытай капиталының ықпалы күшейіп келеді – бұл бағытта 99 компания жұмыс істейді, бұл өткен жылмен салыстырғанда 1,7 есе көп.

Қытайлық бизнес негізінен Алматыда шоғырланған – 2,9 мың компания (+1,6 есе). Одан кейінгі орындарда Астана – 897 (+1,6 есе), Алматы облысы – 137 (+1,8 есе) және Шымкент – 112 (+34,9%).

Ал Жетісу облысында, керісінше, бір жылда сегіз компания жабылып, жалпы саны 48-ге қысқарған.

Еске сала кетейік, бұған дейін LS редакциясы Қытайлық инвесторлар Түркістан облысында жаңа өндіріс орындарын ашуға шамамен 80 млрд теңге көлемінде қаржы құятынын мәлімдеген еді.