Қазақстанда жаңа мұнай кен орны табылды

Қазақстанда сирек кездесетін металдардың жаңа қоры анықталды, деп хабарлайды LS.

Геология комитетінің төрағасы Ерлан Ақбаровтың айтуынша, 2021 жылы ведомствоға 12 жер қойнауын барлау тапсырылған.

"Қазіргі таңда 10 нысандағы барлау жұмыстары толық аяқталды. Нәтижесінде тантал мен ниобий секілді сирек металдардың кен орындары анықталып, олардың қоры мемлекеттік балансқа енгізілді. Бұған қоса, өзге де сирек металдардың бар екені расталды. Атап айтқанда, Шығыс Қазақстанда – екі, оңтүстік өңірлерде – үш, ал Солтүстік Қазақстанда – үш учаске анықталды", – деді ол.

Ақбаровтың айтуынша, ең ірі учаске Қарағанды облысындағы "Қуыректыкөл" кен орны болып отыр. Ондағы өндірістік қор 1 млн тонна сирекжер металдарын құрайды. Ал болжамды қосымша қорлар 20 млн тоннадан асады.

"Қазіргі уақытта бұл кен орындарына инвесторларды тарту жұмыстары жүргізілуде. Сондай-ақ, оларды "Тау-Кен Самұрық" ұлттық компаниясының басқаруына беру мүмкіндігі де қарастырылып жатыр", – деді ол.

Е. Ақбаров ШҚО-да кореялық компаниялардың литий өндіру мерзіміне де түсініктеме берді. Оның қоры 2023 жылы анықталған болатын.

"Қазір келіссөздер кезеңінде жүріп жатыр. Корей тарап жобаны дамыту мен барлау жұмыстарын жүргізуге қызығушылық танытып отыр. Айтылып отырған жоба – "Өрт ГМК". Бұл жобада мемлекет атынан "Тау-Кен Самұрық" компаниясының үлесі болуы ықтимал", – деді комитет төрағасы.

Сондай-ақ, ол 2023 жылы Түркістан облысында литийлі тұзды ерітінді өндіруге лицензия алған канадалық Condor Energies компаниясына қатысты сұраққа жауап берді.

"Қазақстан бұл жобада үлес алмайды. Компания лицензияны бірінші болып алған, яғни "кім бірінші келсе, сол иеленеді" деген қағида бойынша лицензия алған. Енді олар мұнайды іздестіру жұмыстарын бастайды, әрі кейін өндірісті де бірінші бастауға құқықтары бар, – деп түйіндеді Е. Ақбаров.

Еске сала кетейік, мемлекет басшысы Қасым-Жомарт Тоқаев Қазақстанда " жаңа мұнай " саналатын кен орындарын игеруді тапсырған болатын.

Бұған дейін, LS редакциясы сирек жер металдарын өндіру үшін елге шамамен 12 млрд теңге инвестиция тарту жоспары бар екенін жазған болатын.