"10 млн теңге": Павлодарда Наурыз мерекесіне Роза Рымбаева мен Қайрат Нұртасты шақыруға қомақты қаражат жұмсалатыны рас па

Мерекелік концерт 22 наурызда Орталық алаңда өтеді. Жұлдыздарға төленетін гонорарға қала бюджетінен барлығы 10 млн теңге бөлінген. Бұл туралы өңірлік коммуникациялар қызметінде өткен баспасөз мәслихатында Павлодар әкімі орынбасары Светлана Гладышева мәлімдеді, деп хабарлайды Caravan.kz медиа порталы lifepvl.kz — ке сілтеме жасап.

"Негізгі сома, әрине, біздің жұлдыздарға кетті. Біз Роза Рымбаева мен Қайрат Нұртастың гонорары өте қымбат екенін түсінеміз. Олардың жалпы гонорары шамамен 10 млн теңгені құрайды", — деді мерекелік бағдарламаның шығындары туралы сұраққа жауап берген Светлана Гладышева.

Наурыз мейрамын павлодарлықтар екі күн бойы атап өтеді. Мәселен, 21 наурызда мерекелік іс-шаралар қаланың 14 шағын ауданында сағат 11.00-ден 13.00-ге дейін өтеді. Ол аудандарда көрме ретінде киіз үйлері орнатылады:

- Усольский шағын ауданы;

- Олжабай батыр шағын ауданы;

- Ломов көшесі, 64 үй, Торайғыров университеті;

- Ломов көшесі, 45 үй, Инновациялық Еуразия университеті;

- Толстой көшесі, 82-үй;

- Орталық мәдениет және демалыс саябағы;

- Ломов көшесі, 38-үй, Жастар бастамаларын дамыту орталығы;

- Гагарин саябағы;

- Литвинов көшесіндегі алаң;

- Сураганов көшесі, 3-үй;

- Камзин көшесі, 67/1 үй;

- Жаңауыл шағынауданы;

- Теміржолшылар шағынауданы;

- "Жайлау" базары.

Сондай-ақ, мерекелік бағдарламалар Павлодардың барлық қала маңындағы ауылдарында өтеді.

Ал, 22 наурыз күні қаланың орталық алаңында сағат 11.00-де мерекелік іс-шаралар басталады. Мұнда үлкен сахна мен алты тақырыптық киіз үй орнатылады.

Кривенко, Қайырбаев және Астана көшелерінде жастарға арналған ұлттық ойындар мен ойын-сауық аймақтары жұмыс істейтін болады. Барлық ниет білдірушілер мобилография бойынша мастер-класқа қатысып, "Ру грим" және "Қазақ art"алаңдарына бара алады. Сондай-ақ садақ ату, арқан тартыс пен қазақша күресте жарысу, асық ойнау секілді ұлттық ойындар ұйымдастырылады.